കണ്ണൂർ: കണ്ണൂർ ആന്തൂർ നഗരസഭയിലെ യുഡിഎഫ് സ്ഥാനാർത്ഥികളുടെ പത്രിക തള്ളിയ വിവാദത്തിന് പിന്നാലെ യുഡിഎഫ് പ്രവർത്തകർക്കെതിരെ കേസെടുത്ത് തളിപ്പറമ്പ് പൊലീസ്. യുഡിഎഫ് സ്ഥാനാർത്ഥിയുടെ പത്രികയിൽ നിർദേശ സ്ഥാനത്ത് പേരുണ്ടായിരുന്ന കെ പി കൃഷ്ണന്റെ പരാതിയിലാണ് കേസെടുത്ത്. പത്രികയിലേത് തന്റെ ഒപ്പല്ലെന്ന് സത്യവാങ്മൂലം നൽകിയതിന് ഭീഷണിപ്പെടുത്തി എന്നായിരുന്നു കൃഷ്ണന്റെ പരാതി. പത്രികയിലേത് തന്റെ ഒപ്പല്ലെന്ന് കെ പി കൃഷ്ണൻ പറഞ്ഞതോടെ യുഡിഎഫ് സ്ഥാനാർത്ഥിയുടെ പത്രിക വരണാധികാരി തള്ളിയിരുന്നു. ഇതിന് പിന്നാലെ നഗരസഭ ഓഫീസിന് മുന്നിൽ വച്ച് യുഡിഎഫ് പ്രവർത്തകർ ചീത്തവിളിക്കുകയും ഭീഷണിപ്പെടുത്തുകയും ചെയ്തുവെന്ന് കെ പി കൃഷ്ണൻ പരാതിയിൽ പറയുന്നു. അതേസമയം നിർദേശകനെ സിപിഐഎം ഭീഷണിപ്പെടുത്തിയെന്നായിരുന്നു യുഡിഎഫിന്റെ ആരോപണം.
യുഡിഎഫ് സ്ഥാനാർത്ഥിയെ നിർദ്ദേശിക്കുകയോ ഒപ്പിട്ട് നൽകുകയോ ചെയ്തിട്ടില്ലെന്ന് ചൂണ്ടികാട്ടി പറശ്ശിനിക്കടവ് സ്വദേശിയായ കെ പി കൃഷ്ണൻ തളിപ്പറമ്പ് പൊലീസിൽ രണ്ട് ദിവസം മുമ്പാണ് പരാതി നൽകിയത്. സ്ഥാനാർത്ഥിയായ ഷമീമയെ തനിക്ക് പരിചയമില്ലെന്നും സ്ഥാനാർത്ഥിത്വത്തെ നിർദേശിക്കുകയോ ഒപ്പിട്ടുനൽകുകയോ ചെയ്തിട്ടില്ലെന്നും പരാതിയിൽ പറഞ്ഞിരുന്നു. ആന്തൂരിൽ ഏതാണ്ട് കോൺഗ്രസാണെന്ന് തോന്നുന്നവരുടെ വ്യാജ ഒപ്പിട്ട് പത്രിക നൽകുകയാണ് ചെയ്യുന്നതെന്ന് സിപിഐഎം കണ്ണൂർ ജില്ലാ സെക്രട്ടറി കെ കെ രാഗേഷ് പരിഹസിച്ചിരുന്നു. തെരഞ്ഞെടുപ്പ് പ്രക്രിയയെ അട്ടിമറിക്കുന്ന ഗുരുതരമായ നിയമലംഘനമാണ് വ്യാജരേഖ ചമയ്ക്കൽ, ഇതിൽ പങ്കെടുത്ത എല്ലാ പേരിനെയും നിയമത്തിന്റെയും അന്വേഷണത്തിന്റെയും മുന്നിൽ കൊണ്ടുവരേണ്ടതുണ്ടെന്നും കെ കെ രാഗേഷ് പറഞ്ഞിരുന്നു.
Content Highlights: Kannur anthoor UDF candidate nomination Rejected incident updates